«Ազատ դեմոկրատներ» կուսակցության նախագահ Խաչատուր Քոքոբելյանն այսօր լրագրողներին ասաց, որ իրենց դիրքորոշումը նախագահի առաջիկա ընտրության վերաբերյալ առաջիկա օրերին կհստակեցվի, երբ կուսակցությունը վարչության նիստ կհրավիրի: Նա նշեց, որ իրենց որոշումը կախված չէ նրանից, թե ով է առաջադրվում, ով ոչ: «Դա ուղղակի մեր ներքին ռեսուրսի և ներքին հնարավորությունների ու մոտեցումների շարադրման և ճիշտ օգտագործման հետ է կապված»,- ասաց նա: Խաչատուր Քոքոբելյանն ընդգծեց, որ դեռևս փակված չէ հարցը` «Ազատ Դեմոկրատներ» կուսակցությունը սեփական թեկնածուով հանդես կգա ընտրություններում, թե ոչ:«Ասել եմ, որ եթե չմասնակցենք՝ ինչու չենք մասնակցի: Մենք այնքան միամիտ չենք, որ մտածենք` այս ընտրություններին հնարավոր է գնալ և շոշափելի հաղթանակ ունենալ կամ արդյունքներ գրանցել: Բայց միաժամանակ նաև մտածում եմ, որ ընտրությունները հնարավորություն են, որտեղ կարող ենք ներկայացնել մեր տեսակետները, ի նկատի ունեմ նաև գաղափարական առումով` հասարակության ավելի լայն շրջանակների համար: Բայց միաժամանակ ես գտնում եմ, որ ընտրությունները լավագույն ձևը չեն կամ միակ ձևը չեն այդ մոտեցումները ներկայացնելու: Ինչևիցե, այս խնդիրը մեզ մոտ դեռ փակված չէ»,- ընդգծեց նա: «Ազատ դեմոկրատների» ղեկավարը նշեց, որ որևէ այլ թեկնածուի, այդ թվում` իր կողմից հարգված Հրանտ Բագրատյանի թեկնածությանը սատարելու համար նախ պետք է ծանոթանալ ծրագրային մոտեցումներին: Ըստ Քոքոբելյանի` ինչ-որ մեկի օգտին քվեարկելը շատ նորմալ է, բայց պաշտպանել՝ նշանակում է ընդհանրապես պաշտպանել այլ ուժի քաղաքական մոտեցումները: Իսկ նման դեպքերում որոշում պետք է կայացվի լուրջ քննարկման արդյունքում, և ոչ թե ծանոթ-բարեկամ լինելու համար: Նա միաժամանակ նշեց, որ այսօր այնպիսի քաղաքական իրավիճակ է ստեղծվել, որ եթե այս վիճակը պահպանվի, կարծես թե բոյկոտի վիճակ է ստացվում: «Ես բոյկոտը միշտ համարել եմ վատ մոտեցում քաղաքական դաշտում և կարծում եմ, որ ընտրությունների ժամանակ բոյկոտը լավագույն ձևը չէ»,- ընդգծեց նա: Ինչ վերաբերում է Ժառանգություն կուսակցության առաջնորդ Րաֆֆի Հովհաննիսյանի թեկնածությունը ստարելուն, ապա Խաչատուր Քոքոբելյանը նշեց, որ Ժառանգության թեման իրենց համար փակված է:
lragir.am, Երկուշաբթի, 24 Դեկտեմբերի 2012, 15:54
